Posted on

სამეფო ოჯახის ორდენთა სისტემა

სამეფო ოჯახის სარაინდო ორდენები   

†

  საქართველოს სამეფოს არსებობის პერიოდში სარაინდო ორდენით დაჯილდოვების ტრადიცია საქართველოში არ არსებობდა. ქვეყნის წინაშე დამსახურებისა და ერთგულებისათვის ქართველი გვირგვინოსნები, ევროპელებისგან განსხვავებით, თავიანთ ქვეშევრდომებს აჯილდოვებდნენ ხმლით, მამულით, ციხესიმაგრით ა.შ. თუმცა, საქართველოს სამეფოს არსებობის ბოლო წლებში, სარაინდო ორდენის დაარსების პირველი პროექტი მაინც იქნა შემუშავებული, კერძოდ, 1799 წლის 10 მაისს, ჯერ კიდევ ქართული სახელმწიფოს არსებობის დროს, საქართველოს უკანასკნელი მეფის, გიორგი XII-ის შვილმა, ბატონიშვილმა იოანემ, თავის გვირგვინოსან მამას წარუდგინა სარაინდო ორდენთა დაარსების გეგმა/პროექტი. აღნიშნულ პროექტში შემუშავებული იყო ოთხი სახის ორდენი და მანამდე არსებული ტრადიციული ჯილდო – მოჭედილი ხმალი. მეფე გიორგიმ მოიწონა ეს გეგმა, თუმცა სამწუხაროდ იგი ვერ განხორციელდა, რადგან დასნეულებული მეფე გიორგი წელიწადნახევარში გარდაიცვალა, ხოლო 1801 წელს ქართული სახელმწიფო რუსეთის იმპერიის მიერ ვერაგულად იქნა გაუქმებული.

 ამ ისტორიული მოვლენიდან ორ საუკუნოვანი წყვეტის შემდეგ, 2009 წლის 25 დეკემბერს, საქართველოს სამეფო ტახტის მემკვიდრემ, ბატონიშვილმა ნუგზარმა, გამოსცა სპეციალური დეკრეტი, რაც გულისხმობდა მისი უშუალო წინაპრების მიერ თავის დროზე განუხორციელებელი პროექტის აღდგენას. ღვთის შეწევნით, 2009 წლის დეკრეტის თანახმად, დაარსდა საქართველოს სამეფო სახლის შემდეგი სარაინდო ორდენები: “საქართველოს სამეფოს გვირგვინის სამეფო ორდენი”, “მეფე ერეკლე მეორის სამეფო ორდენი”, “დიდმოწამე ქეთევან დედოფლის სამეფო ორდენი” და “წმინდა დავით მეფსალმუნის სამეფო ორდენი”.

 

♦  წმინდა დავით მეფსალმუნის სამეფო ორდენი

 ‘წმინდა დავით მეფსალმუნის სამეფო ორდენი’ განკუთვნილია მსოფლიოს სხვა ლეგიტიმური და ავთენტური სამეფო სახლების მეთაურებისთვის. ეს პატივი ასევე შეიძლება მიენიჭოთ ეკლესიის იერარქებს და სხვა სუვერენული ქვეყნების მეთაურებს. აღნიშნული ორდენი შეიძლება მიენიჭოთ როგორც საქართველოს მოქალაქეებს, ასევე უცხო ქვეყნის მოქალაქეებსაც. სამეფო ოჯახის ორდენთა იერარქიაში ‘წმინდა დავით მეფსალმუნის სამეფო ორდენი’ პატივით უმაღლესი ორდენია და ყველა დანარჩენ ორდენზე მაღლა დგას.

 

♦  დიდმოწამე ქეთევან დედოფლის სამეფო ორდენი

გადაეცემათ იმ პირებს, რომლებსაც განსაკუთრებული დამსახურება აქვთ საქართველოს სამეფო სახლის წინაშე და/ან წვლილი შეიტანეს ქართველი ხალხის ან მართლმადიდებლური ეკლესიის კეთილდღეობის საქმეში. ის განსაზღვრულია როგორც საქართველოს, ასევე უცხო ქვეყნის მოქალაქეთათვის.

 

♦  მეფე ერეკლე მეორის სამეფო ორდენი

 ‘მეფე ერეკლე II-ის სამეფო ორდენი’ გაიცემა ექსკლუზიურად საქართველოს მოქალაქეებზე მხოლოდ და წარმოადგენს ჯილდოს იმ პირთათვის, რომლებმაც წვლილი შეიტანეს ქვეყნის განვითარებასა და კეთილდღეობაში. აღნიშნული ორდენის წევრები შეიძლება გახდნენ მთავრობის, ეკლესიის, სახელოვნებო, სპორტის, სამეცნიერო და სხვა სფეროების წარმომადგენლები.

 

♦  საქართველოს სამეფოს გვირგვინის სამეფო ორდენი

‘საქართველოს სამეფოს გვირგვინის სამეფო ორდენი’ არის ჯილდო, რომელიც ენიჭება პირებს, რომლებიც ემსახურნენ საქართველოს სამეფო სახლს და/ან წვლილი შეიტანეს ქართველი ხალხის კეთილდღეობის საქმეში. ორდენი შეიძლება მიენიჭოს როგორც საქართველოს, ასევე უცხო ქვეყნის მოქალაქეებს.

 

Posted on

საქართველოს სამეფო სახლის განცხადება

temp23მოგეხსენებათ, რომ თითქმის 200 წლიანი წყვეტის შემდგომ, საქართველოს სამეფო სახლის მეთაურმა, საქართველოს უკანასკნელი მეფის, გიორგი XII-ის მემკვიდრემ, ბატონიშვილმა ნუგზარ ბაგრატიონ-გრუზინსკიმ აღასრულა მისი უშუალო მეფე-წინაპრების სურვილი და 2010 წელს შესაბამისი დეკრეტით დააფუძნა სამი დინასტიური ორდენი.

ეს ინიციატივა გამოწვეული იყო წარსულის იმ რეალობიდან, რასაც ერეკლე მეფის ევროპისაკენ სწრაფვის პოლიტიკა ერქვა. კერძოდ, ცარისტული რუსეთის მიერ საქართველოს სამეფოს უკანონოდ ანექსირებამდე, საქართველოს ეკონომიკურ-პოლიტიკური კურსი ევროპული იყო, რაც გამოიხატებოდა, თუნდაც სამეფოს ადმინისტრაციულ-თანამდებობრივ ეშელონებში ევროპული ტერმინოლოგიის დაფუძნებით (ცერემონმეისტერი, რექტორი, ფელცეხმეისტერი, კანცლერი, კაპიტანი და ა.შ.).

ევროპული კურსის გამოხატულებადვე უნდა ჩაითვალოს სამეფო ოჯახში, კერძოდ ბატონიშვილთა შორის ფიქრი, ევროპული ყაიდის რაინდული ორდენების დაარსების თაობაზეც, რომლის ტრადიციაც საქართველოს სამეფოში მანამდე არ არსებობდა.

რაინდთა ორდენის შემუშავებაზე დიდად უღვაწია ღვაწლმოსილ ქართველს, ბატონიშვილ იოანეს, რომელმაც 1799 წელს თავის მამას – გიორგი XII-ს წარუდგინა ოთხი რაინდული ორდენის – წმ.დავით აღმაშენებლის, წმ. თამარ მეფის, წმ. ქეთევან წამებულისა და წმ. გიორგის ორდენთა დაარსების გეგმა, რაც საქართველოს უკანასკნელმა გვირგვინოსანმა ძალიან მოიწონა. სამწუხაროდ, ამ გეგმას განხორციელება არ ეწერა, რადგან მალევე გიორგი XII გარდაიცვალა და რუსეთმა გააუქმა საქართველოს სამეფო ტახტი, სამეფო ოჯახის წევრები კი ძალით გადაასახლა რუსეთში.

სწორედ, ამიტომაც, დღეს, საქართველოს სამეფო სახლის მეთაური, ბატონიშვილი ნუგზარი, მის მიერ დაარსებული რაინდული ორდენის მეშვეობით სიმბოლურად გამოხატავს მის წინაპართა მიერ ევროპისაკენ სწრაფვის მტკიცე კურსს და ამასთანავე, აღადგენს ერთგვარ სულიერ კავშირს თავის უშუალო წინაპრებთან. მნიშვნელოვანია, რომ ბატონიშვილი ნუგზარი ამ ორდენის მინიჭებით გამოხატავს მადლიერებას მამულიშვილთა მიმართ, რომელთაც გარკვეული დამსახურებები გააჩნიათ საქართველოს წინაშე.

სამწუხაროა, რომ მთელი 200 წლის განმავლობაში სამეფო ოჯახი, ქვეყანაში არსებული სხვადასხვა რეჟიმების გამო, დღემდე მოკლებული იყო გამოეყენებინა, საერთაშორისო სამართლით აღიარებული მისი იურიდიული უფლება, მიენიჭებინა რაინდობა ბუმბერაზ მამულიშვილთათვის და ამით, მოკრძალებულად დაეფასებინა მათი უზარმაზარი ღვაწლი ქვეყნის წინაშე.

საქართველოს სამეფო სახლს, ასევე სურს გამოეხმაუროს ხელოვნურად შეთხზულ, იმ უსაფუძვლო მითქმა-მოთქმას, რომ, თითქოსდა, სამეფო სახლის მეთაურის მიერ რაინდული ინსტიტუტის დაარსება პირდაპირ კავშირში იყოს დღესვე, ან ხვალვე, ქვეყანაში კონსტიტუციური მონარქიის შემოღებასთან.
გვსურს დავაფიქსიროთ, რომ ასეთი დეზინფორმაციის გავრცელება მიზანმიმართულად ხდება იმ ადამიანების მიერ, რომელთაც სურვილი აქვთ მოსახლეობაში ხელოვნურად გამოიწვიონ აურზაური და ამით მონარქიული იდეის დისკრედიტაცია მოახდინონ.

Posted on

ბატონიშვილი ნუგზარის ჩამომავლობის გენეალოგიური ხე


ქართული გენეალოგიური საზოგადოების მიერ მოწოდებული ბატონიშვილ ნუგზარ ბაგრატიონი-გრუზინსკის ჩამომავლობის გენეალოგიური ხე, რომელიც ასახავს სამეფო სახლის მეთაურის გენეალოგიურ სამართალმემკვიდრეობას სამივე ისტორიულ სამეფოსთან.

gen-xe

Posted on

მიმართვა საქართველოს კათოლიკოს-პატრიარქს

საქართველოს სამეფო ტახტის მემკვიდრეობითობასთან დაკავშირებული საკითხის გარკვევისათვის

საქართველოს კათოლიკოს-პატრიარქს,  უწმიდესსა და უნეტარეს ილია II-ს

თქვენო უწმინდესობავ და უნეტარესობავ,
თქვენი მოთხოვნის თანახმად, ორივე ოჯახის წარმომადგენლები შეუდგნენ დაგვიანებულ საქორწინო ხელშეკრულებაზე მუშაობას, რომლის შეხვედრის ოქმები გეგზავნებოდათ თქვენ. სამწუხაროდ, თავადიშვილმა დავითმა ისე დატოვა საქართველო, რომ საბოლოოდ ხელშეკრულებას ხელი ვერ მოეწერა.
ღვთის წყალობით აღსრულდა თქვენი, როგორც ქართველი ერის სულიერი წინამძღოლისა და საქართველოს სამეფო სახლის მეთაურის, ბატონიშვილი ნუგზარის სურვილი, 2011 წლის 27 სექტემბერს ბატონიშვილ ანას მეორე ქორწინებიდან შეეძინა ვაჟი, მაგრამ იმის გამო, რომ ზემოთ ხსენებული ქორწინება დღემდე არ მოექცა ქართული დინასტიური სამართლის ჩარჩოებში და არ იქნა გათვალისწინებული ისტორიული ჭეშმარიტება, ამიტომ, საერთაშორისო და ქართული დინასტიური სამართლით, დაბადებული ვაჟი ჯერჯერობით რჩება ბაგრატიონ-მუხრანელთა თავადური ხაზის გამგრძელებლად და არა ბაგრატიონ-გრუზინსკების სამეფო ხაზისა (იხ. გენეალოგიური ტაბულა).
სამწუხაროდ, ზემოთ აღნიშნული ფაქტი არ აძლევს საშუალებას საქართველოს სამეფო სახლის მეთაურს, ბატონიშვილ ნუგზარს, მისი სურვილის მიუხედავად, დღესვე გამოაცხადოს მისი შვილიშვილი საქართველოს სამეფო ტახტის მემკვიდრედ. ყოველივე ამან კი, შეიძლება მომავალში გამოიწვიოს ახალი პრეტენდენტების გაჩენა და ქაოსი სამეფო ტახტთან მიმართებაში.
ქართული დინასტიური წესის დაცვის შემთხვევაში კი, ახალშობილი გიორგი გაუსწრებს უფროს დებს ტახტის მემკვიდრეობის რიგში, რადგან საქართველო ჯერ კიდევ ევროკავშირის წევრი არ არის და შესაბამისად ჯერ სავალდებულო არ არის ევროკავშირის რეკომენდაციების გათვალისწინება, რომლის თანახმადაც ევროპის სამეფო სახლებში ტახტის მემკვიდრედ ცხადდება უფროსი შვილი, ქალი იქნება თუ კაცი.
მანამადე კი, შექმნილი ვითარებიდან გამომდინარე, შესაძლებელია აღსრულდეს თქვენი და სამეფო სახლის მეთაურის შეთანხმება, ბატონიშვილ ანასა და თავადი დავითის ქორწინებიდან შობილი ვაჟი გიორგი გამოცხადდეს საქართველოს სამეფო ტახტის მომავალ მემკვიდრედ, რისთვისაც გთხოვთ მოიწვიოთ წმინდა სინოდი, რომელიც განიხილავს ჩვენს წინამდებარე მომართვას და სინოდალური განჩინებით დაადგენს:
2009 წლის 8 თებერვალს მისი სამეფო უმაღლესობის, ბატონიშვილ ანა ბაგრატიონ-გრუზინსკისა და მისი ბრწყინვალების, თავადიშვილ დავით ბაგრატიონ-მუხრანელს შორის შემდგარი ქორწინება აღიარებულ იქნას “ზედსიძეობის” ქართული სამართლის წესით. თავადი დავითი გახდება მეუღლე-კონსორტი, როგორც მომავალი ტახტის მემკვიდრის მამა და ოჯახის უფროსი და არა სამეფო სახლის, ან დინასტიის მეთაური, რაც დინასტიური კანონმდებლობით ბატონიშვილი ნუგზარის ექსკლუზიური უფლებაა და ეს უფლება შემდგომ ბატონიშვილ ანას მეშვეობით მის მომავალ ძეზე მემკვიდრეობით გადავა.
ამ ქორწინებიდან 2011 წლის 27 სექტემბერს შობილი ვაჟი – გიორგი, დედის – ბატონიშვილი ანას ხაზით მიიღებს სამეფო ღირსებას, როგორც ბაგრატიონ-გრუზინსკების ისტორიული სამეფო ხაზის გამგრძელებელი და გამოცხადდება საქართველოს ტახტის მომავალ მემკვიდრედ.
თქვენო უწმინდესობავ და უნეტარესობავ,
მიგვაჩნია, რომ დღეს სინოდალური განჩინებით შესაძლებელია ბატონიშვილი ანას მეორე ქორწინებისა და შესაბამისად, საქართველოს სამეფო ტახტის მომავალი მემკვიდრის ლეგიტიმაციის სამართლებრივ ჩარჩოში მოქცევა, რაც ერთხელ და სამუდამოდ გადაწყვეტს საქართველოს სამეფო ტახტის მომავალი მემკვიდრის საკითხს.
ჩვენი მიზანი არ გახლავთ მონარქიის შემოღება-არშემოღების საკითხის დაყენება, ჩვენი მიზანია ისტორიული სამართლიანობიდან გამომდინარე, როგორც ჩვენი ერის კულტურული მემკვიდრეობის ნაწილის – ბაგრატიონ-გრუზინსკების სამეფო ხაზის უწყვეტობის შენარჩუნება, სახელმწიფოსა და ეკლესიის მხრიდან მისი აღიარება და დაცვა.
უმორჩილესად გთხოვთ მიგვიღოთ ქვემორე ხელის მომწერნი, რათა ერთობლივად აღვუდგეთ უმეცრებას, სიყალბეს და როგორც თქვენ ხშირად ბრძანებთ, დავდგეთ სიმართლის მხარეს და აღვასრულოთ კანონიერება, რაც სათნო იქნება უფლისათვის.
ვიმედოვნებთ, რომ ეს საკითხი გადაწყდება პატარა გიორგის ნათლობამდე და იგი მის სულიერ შობას მიიღებს, როგორც უკვე ტახტის მომავალი მემკვიდრე.
უფალი გვფარავდეს !

2012 წლის 11 თებერვალი

ს.მ.ა. აკადემიკოსი მარიამ ლორთქიფანიძე
ს.მ.ა. აკადემიკოსი დავით მუსხელიშვილი
ს.მ.ა. აკადემიკოსი როინ მეტრეველი
მიტროპოლიტი ანანია (ჯაფარიძე)
ი.მ. დოქტორი დავით ნინიძე
ი.მ. დოქტორი გიორგი ოთხმეზური
“კავკასიის ფონდის” პრეზიდენტი გივი ღამბაშიძე

Posted on

საქართველოს სამეფო ოჯახი XIX საუკუნის ბოლოს

samepo-ojaxi-XIX-saukunis-bolosსაქართველოს სამეფო ოჯახი XIX საუკუნის ბოლოს. სურათზე გამოსახულნი არიან ბატონიშვილები ილია, მიხეილი და პეტრე ალექსანდრეს ძე ბაგრატიონ-გრუზინსკები დედასთან – ელენე თარხან-მოურავთან ერთად (სურათი №1).

ბაგრატიონ-გრუზინსკების სამეფო ოჯახი XIX საუკუნის ბოლოს. ქვემოთ ზის ბატონიშვილი პეტრე ალექსანდრეს ძე, დღევანდელი სამეფო სახლის მეთაურის, ბატონიშვილი ნუგზარის ბაბუა (სურათი №2).

samepo-ojaxi-XIX-is-bolos